[amj22224]

Ehsas ki nazar se tujh ko chura k lau’n
Ambar se chandni ki ik shaal ja k lau’n

Baraat jugnuo’n ki ho raat khushbuo’n ki
Ho seij dil ki tujh ko dulhan bana k lau’n

Ha’n jo malool dil ko masroor kar k rakh dein
Tere liye kuch aisi shame’n saja k lau’n

Khushia’n khushi se tujh ko sadya’n bhi daan kar dein
Muthhi mein chand aise lamhey chhupa k lau’n

Rim jhim si koi sa’at mil jaey gar tujhey bhi
Apni muhabbato’n k mausam dikha k lau’n

Gajray mein tere bhar doo’n titli k rang saaray
Qaus-e-qazah se tera ghoongat bana k lau’n

Rakhna hai paas shahi ne apney naam ka bhi
Naino’n ki palki mein tujh ko bitha k lau’n