Quote:
Originally Posted by maikasH
aadaab yaaraan-e-mehfil
maut ki chaahat kam hi logoN ko hoti hai, kuch log kehte haiN ke "jaan hai to jahaan hai" mujhe is baat se ittefaaq nahiiN, maut hi ek aisi shay hai duniya meiN jo apne chaahne waaloN ki ummiidoN pe har baar kharaa utar ke dikhaati hai
is nazm ka tassavvur maine kayi saal pehle kiya tha aur waqt ke saath saath iske DhaaNche meiN bohat tabdiiliiyaaN bhi aayiiN aur shaayad aage bhi aayeNgii, ye kisi haal meiN bhi muqammal nahiiN hai, aaj mann hua ke post karuuN to kar raha huuN, ummiid hai aapko qaabil-e-ga'ur lagegi
nazm ka unvaan hai "zaroorat"
mula'iizaa farmaayeN :
nijaat qaid-e-Gham se mujhko dilaa de saaqi
maiN haath joDta huuN zahar pilaa de saaqi
tere dar pe maiN badii aas liye aayaa huuN
ashk aaNkhoN meiN haiN TuuTa hua dil laya huuN
suna hai dard ke maaroN ko panaah milti hai
dil ke zakhmoN ki tere paas davaa milti hai
mujhe vo jaam de ke pee ke dam nikal jaaye
taDap rahi hai jaan kuch sukuun mil jaaye
maiN ziNdagi se ab nibaah kar nahiiN sakta
maiN roz-roz,lamha-lamha mar nahiiN sakta
maine choDa tha zamaana jisey paane ke liye
usii ne choD diya mujhko, zamaane ke liye
tavvaqo'aat* se daaman ko chuDaaya hi nahiiN
dil ne us shaKhs ki yaadoN ko bhulaaya hi nahiiN
tavvaqo'aat = Expectations , UmmiideiN
maine bacchoN ki tarah dard ko paalaa dil meiN
muddatoN zakhm-e-mohabbat ko saNbhaala dil meiN
dil ke tuKdoN ki khalish ab nahiiN sahi jaati
mujhse haalaat yeh apni ab nahiiN dekhii jaati
jaan dene ke ilaawaa ko_ii chaara hi nahiiN
ab mera ziNdagii ke saath guzaara hi nahiiN
meri saaNsoN ka diyaa aaj bhujhaa de saaqi
maiN haath joDta huuN zahar pilaa de saaqi
maiN haath joDta huuN zahar pilaa de saaqi...................
apni aaraa se zaruur nawaazeiN
shukriya
maikash
|
Assalam maikash bahot acha likha hai apne such hai yeh nazam kabhi mukammal ho hi nahi sakti jab tak app ke dil me dard hai aisa hi dard app bikharte rahenge..... yeh silsila to sansoo ke tootjane ke baad hi khatm hoga......
app jis daur se guzar rahe hai iska andaz main laga sakta hun kun ki is daur se main bahi guzar raha hoon....... jo dard apne apne sine mein daba rakha hai use bahot hi khubsurti se kagaz pe utara hai apne.......
yeh dua hai meri rab se apko apki khushiya zaroor mile
Allah Hafiz