[B.G.M.]

Dosto, aaj ik sadaa, magar dil ko Chhuu jaane waali Ghazal nazar-namaaz hu'ii, sochaa, kyuuN nah isay yahaaN chaspaan kar duuN or aap ko bhi is kaa lutf 'Inaayat ho!

Ghazal


duur hu'a ibhaam*, kahaani Khatm hu'ii
aa pahuNchaa anjaam, kahaani Khatm hu'ii

shahzaadah,shahzaadi rastaa bhuul gaye
raah meN ho gayi shaam, kahaani Khatm hu'ii

mat ChheRo woh saaz-e-ta'alluq Khatm hu'a
mat lo us kaa naam, kahaani Khatm hu'ii

kis ki Khaatir ab tuu dhaRaktaa rehnaa hai?
ai dil, kar aaraam, kahaani Khatm hu'ii

sun ne waale, bas, thoRaa saa sabr kareN
qissah hu'a tamaam, kahaani Khatm hu'ii

guzri umr ki baatoN ko dohraaye kyaa
ab KhwaaHish hai Khaam*, kahaani Khatm hu'ii

yaad nahiiN ab, biChhRe woh kirdaar kahaaN
yaad nahiiN kis gaam*, kahaani Khatm hu'ii

:Shabnam: aa'o, nayaa safar aaGhaaz kareN
yaaN apnaa kyaa kaam, kahaani Khatm hu'ii


~"Shabnam" Shakeel

-------------------------------------------------
*ibhaam = ambiguity
*Khaam = useless
*gaam = step

================================