yaad beete dinoN kii dilaate ho kyoN -
13th June 2002, 06:59 AM
yaad beete dinoN kii dilaate ho kyoN
maiN bahut ro chukaa, ab rulaate ho kyoN
kab ye maiN ne kahaa hai, ho tum be'vafaa
apnii majbuuriyaaN tum bataate ho kyoN
gar nahiiN ho kisii ke gunahgaar tum
apnaa muNh is jahaaN se chhupaate ho kyoN
kyaa milegaa tumheN raakh ke Dher se
Khaak meN mujh ko aaKhir milaate ho kyoN
surKh hai Khuun-e-dil bhii miraa, ai sanam!
apne haathoN meN meNhdii lagaate ho kyoN
lauT kar apne ghar bhii na maiN jaa sakuuN
saaqiyaa! mujh ko itnii pilaate ho kyoN
dekh kar mujh ko kahtaa hai ye, aainaa
aaNkh nam hai to phir muskuraate ho kyoN
huuN Khataavaar, maiN Khud chalaa jaauuNgaa
apnii mehfil se tum uTh ke jaate ho kyoN
dostoN kii tarah mat milo, Thiik hai
dushmanoN kii tarah pesh aate ho kyoN
jab ai "maikasH" huaa tum se voh be'vafaa
tum bhi apni taraf se nibhaate ho kyoN !!
maikasH
.........................................
is tarhe teri yaad meiN har shaam dhaley hai
goyaa koyi nagin si kalejey pe chaley hai
maikash
...............................
|