Maya 54 dohe -
20th January 2011, 11:08 AM
Dosto:
Vaise to maya pe bhut kuch likha jaa chuka hai, fir bhi iska concept mere liye akarshit raha hai aur isise prerit hokar maine 54 dohe maya par likhe hain. Har doha shabd Maya se shuru hota hai. aur ismein mera paryaas hamari aaj ki duniyaan se relate karne ka hai. mere apne views maya ke bare doha 4,6,13,17,23,25,333 aur 34 me ankit hain. aasha karta hun apko meri ye koshish pasand aayegi. apki rai ki intzar main
Hardev Ashk
MAYA 54 DOHE
Maya tere roop ke aakarshit rang hazaar
ruh se naata toRkar kar liya tujhse payaar 1
Maya tujhmeiN magan ho paNDit bhaye nadaan
butt pooja meiN lag gaye bhool gaye Bhagwaan 2
Maya nagri meiN Chal kapaT dhurat ka hai raaj
Degree ki boli lagaie paisa karaaye kaaj 3
Maya se bachkar raho parvachan diyo mahaNt
par do meri dakshna nakad ya visa turant 4
Maya bhrashT budhi kare, deen bhoole insaan
Internet pe katal se kaise bhaRegi shaan 5
Maya agni lalsaa roop ati parchaND
Peer Sayiad Ajmeri Baba PaNDit kiyo pakhaND 6
Maya tujh meiN Doobkar BhrashT ho gaye saNt
tabhi mere GobiNd ne kaha “Guru maaneo GraNTH” 7
Maya nagri meiN teri ‘Meraa ,Meraa, pardhaan
dujoN ka haq CHeenkar kareiN apna kalyaan 8
Maya toone looT liye maanav, dev, pishaach
aisee karni hai teri bhule sach ki jaach 9
Maya tere din ke ajab haiN saNjh sver
Dhan waala maNgta bana nirdhan hua kuber 10
Maya kab paidaa hui koi na jaane bhed
haaN is-se bachkar raho kaheiN graNth aur ved 11
Maya lat dhan ki bani kahiN roop saNgeet
ik dooje ko ChoRkar bhaage jaayeiN meet 12
Maya, moh, ahaN, kaam hai jin jazboN ka ehsaas
bin unke naN duniyaN chale lok kareiN banwaas 13
Maya na tujhko taj sake purshotam Shri Ram
Seeta mayaa tayaag kar ban gaye insaan 14
Maya teri agan meiN jale so nirbal hoye
heera samjhe kaaNch ko sona peetal hoye 15
Maya ke jaNjaal se Krishan nahi bach paaye
“AshwTHaama” ke jhooTH se paaNdav liyo bachaaye16
Maya ri too mohini aur ati chitchor
Vishvamittar dekhi Menika huaie aanaNd vibhor17
Maya karam kaaND ki do dhaari talwaar
eik dhaar ghrinna bani dooji ban gayee payaar18
Maya dharti ko shiNgaar kaisa diyaa sajaaye
dev janoN ka man bhi aaneiN ko lalchaaye 19
Maya kaNchan kayaa meiN kaala dil hai piroye
rishte TooTeiN pal meiN, mittar vidhrohi hoye 20
Maya sapne suNdar sajaa chalaaye yeh saNsaar
kareiN chaakri vaasna lobh moh ahaNkaar 21
Maya teri CHavi se kiya bhi jisne payaar
Aisaa jadoo kar diya bhula sirjanhaar 22
Maya simran tera kareiN aur pooja na hoye
maNdir meiN bhi baiTHkar dhyaan tere meiN khoye23
Maya tera drev, munijan kar na sake virodh
INdar ko shakti ghumaNd Parshu Ram krodh 24
Maya ke darbaar meiN sach jhooTH na koye
Jaisa chaSHmaaN Daaliye vaisa hi ruNg hoye 25
Maya ke suNg vichro par hath na uske aaoo
kaheiN Baba Nanak tum karam yogi ban jaao 26
Maya garv na keeje ye hai paNCHi samaan
Mrigtrishna ki jaani jaane kab bhar le uRaan 27
Maya ke saNtaap se jab man tera roye
Sai charaN ki oaT le sab dukh dga dhoye 28
Maya makRi jaal se koi nahiN bach paaye
Maanav daanav dev munijan sab chuNgal meiN aaye29
Maya ke bahkaave jab aa jaaye insaan
Bahan bhai kaya baNdhujan ban jaye haivaan 30
Maya se ruTHiye na keeje is-se payaar
aNtar aatma ki sun vichro beech saNsaar 31
Maya ANtar man ko jab deti hai maar
Khudgarzi fir jeevan ka ban jaati aadhaar32
Maya aur Bhagwaan meiN itna hi aNtar bhai
eik kraaye kaid aur duja deve rihaaee 33
Maya jeevan ke sapnoN ko deti aakaar
Ab yeh maanav pe nirbhar vo kaise kare saakaar 34
Maya trishna kal THi hai aaj rahegi kal
Samay ki seeDHi pe haNphti gayee umariya Dhal 35
Maya jiska aadi kare haoga uska aNt g
amaiyaN khushiayaN dhan jeevan kuCH bhi nahiN beaNt 36
Maya sevan itna karo jo tan ka sar jaaye
Par na itna karo ki man ko har jaaye 37
Maya bin guru gyaan ke jaise aNdhi talwaar
Kab jaane ban raaKHshas kar de tujh pe vaar 38
Maya vish ka payaala hai ya madira bhara gilass
Ye jaano to aa jaayega jeene meiN vishwaas 39
Maya Rab ki mahima hi socho na man hoga upraam
“sabh hai mujh meiN smaya” bole Arjun se GhanShyam 40
Maya aaDubmar ajab hai jo paas lage vo door
Khud ko SikaNdar kahne Waala hota ik din majboor 41
Maya ruTHe dil na TooTe aisa khud ko banaao
Ye jeevan saugaat hai Rab ki samjho khushi manaao 42
Maya maaNgi jab bhi maaNgi, gaye teeraTH kiye snaan
hum Duryodhan ban gaye, maaNga na kabhi Bhagwaan 43
Maya mast havaa se jab ban jaaye tufaan
insaaN ke roop meiN fir Dhal jaaye shaitaan 44
Maya ke saNsaar meiN mat DhooNdo bhagwaan
Itna hi bahut gar jee leIN hum banke insaan 45
Maya ke vistaar meiN eik samay jo rahe aTal
karmoN ka phal yahiN mile aaj naiN to kal 46
Maya se na itna hi uljho ki saNtulan na khoye
Dost banke dost rahe koi bairi na hoye 47
Maya man main deep sajaakar ashaa hai deti jagaa
Koi kare us-se aarti koi ghar ko deve jalaa 48
Maya aur paNch chaakar uske rab ke haiN vardaan
Bin inke ho kaise jag meiN insaaN ki pehchaan 49
Maya sirjanhaar hai anhad shakti mahaan
Ham jhagReiN dekar usko apne roop aur naam 50
Maya ki deevaroN meiN jab dab jaaye ehsaas
tan jeevit man vayakul aur ruh rahe udaas 51
Maya jeev jigyasoo socheiN gar BHagwaan kahaN Bhagwaan
Vishwaas ho shuru kahaN se khatm kahaN ho vigyaan 52
Maya jaise chaDHte paani meiN nayiaa maNjhdaar
Sai bnaa le apna khevat le jaayega paar 53
Maya varnan ko tere janm janm lag jaaye
Fir nirguniyaaN ‘Ashk’ ki kalam na kyoN Thak jaaye 54
Hardev Sodhi ASHK
KUC Surrey, BC
Last edited by Hardev Ashk; 20th January 2011 at 11:14 AM..
Reason: revised doha 52
|