sar meN saudaa bhi nahiiN, dil meN tamannaa bhi nahiiN
lekin is tark-e-muHabbat kaa bharosaa bhi nahiiN
yuuN to hangaame uThaate nahiiN deevaanah-e-‘ishq
magar, ai dost! kuchh aisoN kaa Thikaanaa bhi nahiiN
muddateN guzriiN tirii yaad bhii aa’ii nah hameN
aur tujhe bhuul gaye hoN kabhi aisaa bhi nahiiN
yeh bhii sach hai kih muHabbat meN nahiiN maiN majbuur
yeh bhii sach hai kih tiraa Husn kuchh aisaa bhi nahiiN
dil ki gintii nah yaganoN meN, nah begaanoN meN
lekin us jalvah-gaah-e-naaz se uThtaa bhi nahiiN
bad-gumaaN ho ke mil, ai dost! jo milnaa hai tujhe
yeh jhijhakte hu’e milnaa ko’ii milnaa bhi nahiiN
shikvah-e-jaur kare kyaa ko’ii us shoKh se jo
Saaf qaa’il bhi nahiiN, Saaf mukartaa bhi nahiiN
meharbaanii ko muHabbat nahiiN kehte, ai dost !
aah! ab mujh se tirii ranjisheN bejaa bhi nahiiN
baat yeh hai kih sukuun-e-dil-e-veHshii kaa maqaam
kunj-e-zindaaN bhi nahiiN, vusa'at-e-seHraa bhi nahiiN
muuNh se ham apne buraa to nahiiN kehte, kih 'Firaq'
hai tiraa dost, magar aadamii achchhaa bhi nahiiN
~Raghupat Sahay “firaq” Gorakhpuri
==================================================
(Begam Akhtar ki aavaaz meN isay yahaaN suniye)
http://www.youtube.com/watch?v=gbvUWwtptG0
------------------------------------------------------------------------------------------