Qisse jafaa ke unnki mash-hoor ho gaye haiN

[Sagar Aashna]

Muazizeen dostoN, Aadaab..!

Bohot dinoN se koshish kar raha hooN apne ehsasaat ko beh'r mein band karne ki, lekin nahi ho paaye.
Toh haar kar aapke hawale kar raha hooN, bardasht kar lijiyega.
Mods aur sho'ra hazraat se istidaah hai ke iss aib ko nazar andaaz kar ke sirf ehsasaat ki jaanib jaayeiN. Beh'r bhi seekh jaunga aapka saath raha toh.


Qisse jafaa ke unnki, mash-hoor ho gaye haiN
Sang-e-koo-e-yaar bhi maghroor ho gaye haiN

Yoom-e-azl se ishq meiN haiN zillateiN bhi saath
Dastkashii-o-berukhii ab dastoor ho gaye haiN

Yoom-e-azl= The beginning of the world/aghaaz/ibtidaah
Dastkashi= The break up of a relation/Taa'luq toRna

Insaaf kii tijaarat hogii, rawaaN saal meiN bhi
Mashware siyaasi kuch phir manzoor ho gaye haiN

Takhfeef jo huyii hai mere ghar meiN roshnii kii
Khair khwaah-o-humsafar sab door ho gaye haiN

Takhfeef= Reduction/Kami

Aaqibat ba-khair ho, ahl-e-chaman kii 'Aashna'
Hum toh tark-e-gulshan ko majboor ho gaye haiN

Aaqibat= Consequences/Aakhirat/Anjaam