Shayri.com

Shayri.com (http://www.shayri.com/forums/index.php)
-   Anjuman-e-Shayri (http://www.shayri.com/forums/forumdisplay.php?f=27)
-   -   sadakein...... (http://www.shayri.com/forums/showthread.php?t=33118)

naina_cooleyes 14th March 2005 01:05 AM

sadakein......
 
pathar aur choona bahut tha,
lekin agar thodi si jagah per
deewaar ki tarah ubharkar khada ho jaata....
to ghar ban sakta tha,
per bana nahi......
woh dharti per fael gaya ,
sadakon ki tarah....
aur weh dono tamaam umar un sadakon per chalte rahe
weh ek doosre se miltey rahe,
per sirf tab...
jab kabhi kabhaar unke pairon ke neeche bichee hui sadakein
ek doosre se aakar mil jaati thi....
ghadi pal ke liye shaayad
sadakein bhi chaunk ker ruk jaati thi....
aur unke pair bhi.
aur tab shaayad ...
dono ko us ghar ka khayaal aata tha,
jo bana nahi tha....
ban sakta tha, fir kyun nahi bana?
weh dono hairaan hokar
paon ke neeche ki zameen ko aise dekhtey the....
jaise yeh baat us zameen se pooch rahe hon
aur fir weh kitni hi der
zameen ki oar aise dekhne lagte
maano weh apni nazar se us ghar ki neenv khod lenge....
aur kayi baar sachmuch wahaan
jaadoo ka ek ghar ubharkar khada ho jaata.....
aur weh dono aise sahaj munn ho jaate
maano barson se us ghar mein reh rahe hon....

Jaadoo ki deewaarein banti thi, mitati thi....
aur aakhir unkey beech khandaharon ki khaamoshi ka dher lag jaata tha........

Mohabbat....
Naina

Parul 15th March 2005 01:36 AM

Naina ji,
Aapne ne bahut hi acchi tarah aapke khayal pesh kiye hai, sacchi mein humhari daad kubul karna, humhe bauht accha laga yeh padhkar, aur aaise hi likhte rehna...

Take care!

naina_cooleyes 15th March 2005 04:24 AM

Hi Parul...
 
Aapki daad sar aankhon per....

Mit gaya jab mitane waala, fir salaam aaya to kya....
Dil ki barbaadi ke baad, unka payaam aaya to kya....
Aaj hi mitna tha aye dil hasrate deedaar mein,
Tu meri naakaamiyon ke baad kaam aaya to kya....

Nahi nahi,humein aapse koyi shikaayat nahi parul, yeh jiske liye hai woh khud hi samajh lenge....

Mohabbat...
Naina

karan q 16th March 2005 07:14 PM

Aashiyana
 
Aashiyana .. Khamoshi ke khandar
Wah wahwah ...
na jaane kitne Aashiyane iss kadar roz mere desh me
tuut ker bikhar jaate hain
khayalon per lafzon ki zebaai
or uss per chaahaton ki ruswai
khoob hai .. khoob hai
But i m not happy with the amount of repllys
And the amount of viewer's
This one deserve a lot batter then this
izzajat
karan.q

naina_cooleyes 17th March 2005 12:23 AM

karan....
 
Karan...
Aapki daad mil jaaye to har baat poori ho jaati hai....
Gulazar ki ek baat yaad aa gayi,aapne zaroor suni hogi...

qadam usii mod par jame hain
nazar samete hue khadaa huun
junuun ye majabuur kar rahaa hai palat ke dekhuun
Khudii ye kahatii hai mod mud jaa
agarche ehasaas kah rahaa hai
khule dariiche ke piichhe do aankhein jhaankatii hain
abhii mere intazaar mein vo bhii jaagatii hai
kahiin to us ke goshaa-e-dil mein dard hogaa
use ye zid hai ki main pukaaruun
mujhe taqaazaa hai vo bulaa le
qadam usii mo par jame hain
nazar samete hue khadaa huun

Humaare liye kabhi dil mein koi khaar na rakhna...
zindagi mein pehle hi bahut kaante hain

Mohabbat....
Naina

Lailaa 17th April 2005 07:04 AM

aapne jo likha,khub likha....

jitni gehri baatein aapne likhi,
hume waisa to kuch nahi aata,
halki fulki baat karte hain...

kuch batao to aakhir kya jawaab doon usko,
ek sawaal karta hai,roz mujhse ghar mera,

saari basti mein fakat,mera hi ghar hai be-chiraag
tirgi se aapko mera pata mil jaayega...

ab yehi kahoongi ki
ghar ke dar-o-deewar ko ooncha na karo,
itna gehra meri awaaz se parda na karo....

Lailaa....

naina_cooleyes 18th April 2005 11:41 PM

Shukriya Laila,

ghar chhod ke bhii zindagii hairaaniyon mein hai,
shaharon kaa shor dasht kii viiraaniyon mein hai...

kitanaa kahaa thaa us se ke daaman samet le,
ab vo bhii mere saath pareshaaniyon mein hai...

Mohabbat....
Naina


All times are GMT +5.5. The time now is 01:46 PM.

Powered by vBulletin® Version 3.8.5
Copyright ©2000 - 2021, Jelsoft Enterprises Ltd.