********Main bhi to ek chota sa bachcha hoon*****
 

Sheeshe ke uss paar, sadak ke kinaare
Dekhta hoon, bachche hanste muskurate


Kaandhon pe school ka basta liye hue
Kabhi daudte hue, kabhi shor machaate

Kabhi koi zid karte hue maa baap se
Kabhi chupchap unki ungliyaan thaame

Aate hue, jaate hue dikhte hain roz
Hotel ke sheeshe ke iss paar se mujhe

Din shuru, raat khatm hoti hain yahin
Mez se logon ke joothe bartan uthaate

Kabhi daant to kabhi fatkaar sunte hue
Kabhi kisi grahak ki gaaliyaan khaate

Iss hotel ke bahar kya kabhi aaunga
Sochta hoon kai baar sadak ko dekhte

Haathon main khilaune aaye nahin kabhi
Dekha hai inhe maine bas bartan uthaate

Kyun bhagwaan ne banaya hai mujhe aisa
Nahin hain maa baap, jo pyar lutaate

Main bhi to ek chota sa bachcha hoon
Kyun nahin rehta main hanste muskuraate

Regards



Crtsy: MR. Shayar