Ek nazar idhar bhi

[karan q]

urdu poetry ke bemisaal shayar ,na naam khatam hote hain na unke kalaam phir bhi kuch behtareen nagme chun sakaa janaab
sahab khumaar barabankvi ke.. to yahaan pesh hain..
He was a poet with less varity i guess but what ever he had was awesome,

aisaa nahii.n ki un se mohabbat nahii.n rahii


aisaa nahii.n ki un se mohabbat nahii.n rahii
jazbaat me.n vo pahalii sii shiddat nahii.n rahii

sar me.n vo intazaar kaa saudaa nahii.n rahaa
dil par vo dha.Dakano.n kii hukuumat nahii.n rahii

paiham tavaaf-e-kuuchaa-e-jaanaa ke din gaye
pairo.n me.n chalane phirane kii taaqat nahii.n rahii

paiham-- Continuous

chehare kii jhurriyo.n ne bhayaanak banaa diyaa
aa_iinaa dekhane kii bhii himmat nahii.n rahii

kamzorii-e-nigaah ne sanjiidaa kar diya
jalvo.n se chhe.D-chhaa.D kii aadat nahii.n rahii

allaah jaane maut kahaa.N mar gaii 'Khumar'
ab mujh ko zindagii kii zaruurat nahii.n rahii

-----------------------------------------------------------------------
ek pal me.n ek sadii kaa mazaa ham se puuchhiye


ek pal me.n ek sadii kaa mazaa ham se puuchhiye
do din kii zindagii kaa mazaa ham se puuchhiye

bhuule hai.n unhe.n raftaa raftaa mudatto.n me.n ham
qishto.n me.n Khud_kushii kaa mazaa ham se puuchhiye

aaGaaz-e-aashiqii kaa mazaa aap jaaniye
anjaam-e-aashiqii kaa mazaa ham se puuchhiye

aaGaaz-- bigning

jalate diyo.n me.n jalate gharo.n jaise zau kahaa.N
sarakar raushnii kaa mazaa ham se puuchhiye

vo jaan hii gaye ke hame.n un se pyaar hai
aa.Nkho.n kii muKhbarii kaa mazaa ham se puuchhiye

ha.Nsane kaa shauq ham ko bhii thaa aap kii tarah
ha.Nsiye magar ha.Nsii kaa mazaa ham se puuchhiye

ham taubaa kar ke mar gaye bemaut ai 'Khumar'
tauhiin-e-maikashii kaa mazaa ham se puuchhiye


-----------------------------------------------------------------------
ham unhe.n vo hame.n bhulaa baiThe


ham unhe.n vo hame.n bhulaa baiThe
do gunah_gaar zahar khaa baiThe

haal-e-Gam kah kah ke Gam ba.Dhaa baiThe
tiir maare the tiir khaa baiThe

aa.Ndhiyo.n jaao ab aaraam karo
ham Khud apanaaa diyaa bujhaa baiThe

jii to halkaa huaa magar yaaro
ro ke ham lutf-e-Gam ba.Dhaa baiThe

besahaaro.n kaa hausalaa hii kyaa
ghar me.n ghabaraaye dar pe aa baiThe

jab se bichha.De vo muskuraaye na ham
sab ne chhe.Daa to lab hilaa baiThe

ham rahe mubtalaa-e-dair-o-haram
vo dabe paao.N dil me.n aa baiThe

uTh ke ik bevafaa ne de dii jaan
rah gaye saare baavafaa baiThe

hashr kaa din hai abhii duur 'Khumar'
aap kyo.n zaahido.n me.n jaa baiThe


---------------------------------------------------------------------
hijr kii shab hai aur ujaalaa hai


hijr kii shab hai aur ujaalaa hai
kyaa tasavvur bhii luTane vaalaa hai

Gam to hai ain zindagii lekin
Gam_gusaaro.n ne maar Daalaa hai

ishq majabuur-o-naamuraad sahii
phir bhii zaalim kaa bol_baalaa hai

dekh kar barq kii pareshaanii
aashiyaa.n Khud hii phuu.Nk Daalaa hai

kitane ashko.n ko kitanii aaho.n ko
ik tabassum me.n us ne Dhaalaa hai

terii baato.n ko mai.n ne ai vaa_iz
ahataraamaa ha.Nsii me.n Taalaa hai

maut aaye to din phire shaayad
zindagii ne to maar Daalaa hai

sher nazme.n shaguftagii mastii
Gam kaa jo ruup hai niraalaa hai

laGziishe.n muskuraa_ii hai.n kyaa kyaa
hosh ne jab mujhe sambhaalaa hai

dam andhere me.n ghuT rahaa hai Khumaar
aur chaaro.n taraf ujaalaa hai

[Parastaar]

Karan Sahib...

bahut khubsurat kalaamon se rubaruu karaaya aapne...Khumaar Sahib ke baare mein socha main bhi kuch jodti jaaon...

Khumar Barabankvi ka asli naam Mohammed Haider Khan thaa.Wo 1919 mein Barabankvi, Uttar Pradesh mein paidaa huye thhe. Unki shayri 'Aatish-e-Tar' naam se chapi thee. 1999 mein wo iss jahan se chal base. Unhone hindi filmon ke liye bhi nagme likhe. Jinmein se Tasveer banata hoon tasveer nahi banti, kaafi jaana pehchana hai...



tasviir banaataa huu.N tasviir nahii.n banatii
ek khvaab saa dekhaa hai taabiir nahii.n banatii

bedard muhabbat kaa itanaa saa hai afasaanaa
nazaro.n se milii nazare.n mai.n ho gayaa diivaanaa
ab dil ke bahalane kii tadabiir nahii.n banatii

dam bhar ke liye merii duniyaa me.n chale aao
tarasii huii aa.Nkho.n ko phir shaql dikhaa jaao
mujhase to merii biga.Dii taqadiir nahii.n banatii

--------------------------------------


ai maut! unhe.n bhulaaye zamaane guzar gaye
aa jaa ki zahar khaaye zamaane guzar gaye

O jaane vaale aa ki tere intazaar me.n
raste ko ghar banaaye zamaane guzar gaye

Gam hai na ab Khushii hai na ummiid hai na yaas
sab se najaat paaye zamaane guzar gaye

kyaa laayaq-e-sitam bhii nahii.n ab mai.n dosto.n
patthar bhii ghar me.n aaye zamaane guzar gaye

jaane bahaar phuul nahii.n aadamii huu.N mai.n
aa jaa ki muskuraaye zamaane guzar gaye

kyaa kyaa tavaqqo_at thii aaho.n se ai 'Khumar'
ye tiir bhii chalaaye zamaane guzar gaye

[musharrafhusain]

karan saheb

mein daad deta hoon aap ke zauq-e-intkhaab ki.
khumaar saheb ki bohat khoobsurat ghazlein aap ne post ki hain.
aap ka mutale-aa kaafi wasi maloom hota hai.
isi tarah miyaari kalam irsaal kerte rahein. hem parh ker istifaada haasil kerte rahein ge.
paras aap ka bhi shukriyaa, mazeed maloomaat dene ka khumaar saheb ke bare mein.
umeed kerta hoon yeh meyaari silsila is forum per jaari rahe gaa.

musharrafhusain