yaaraan.e.meHfil: tasleemaat!
Mohtaram Janab Sarwar Alam Raz Saheb ne mundarja zail micre tarah par do ghazlen (aik 17 saal pahle aur doosri 17 saal baad ki) yahan inaayat ki hain:
:junoon.e.shauq meiN seHraa.navard kyaa karte?:
In donon ghazlon ko paRhne k baad chunke ye zameen mujhe bahut achchhi lagi, is liye main ne bhi mundarja baala zameen mein kuchh kahne ki koshish ki hai. Mujhe pata nahin k main kahan tak kaamiyaab hua hoon phir bhi aap logon ke peshe-nazar ye ghazal rakh raha hoon:
Bayeed kuchh bhi nahiN iske maasiwa karte
Fuzul baatoN se hat ke khuda khuda karte
Ki chaak chaak jigar ke sabhi qaba karte
Alam ki raat guzaari hai ilteja karte
Jo dil ho dil ki tarah dil to muddoa karte
Ruju dil ke nawaaoN se baarha karte
Qadaawari ki riyaasat mein ja-ba-ja karte
Ik aaine ke baraabar ik aaina karte
Bana k web pe Urdu ki Anjuman SARWAR
Faraaz-o-fikr ko dekha hai hum ne wa karte
Nazar ne dekha hai sahra-naward aapko bhi
Junoon-e-ishq meiN pairoN ko aabla karte
Zamana aapke naqshe-qadam pe chalta rahe
Hamaari zindagi guzri hai ye dua karte
Milan ki aas liye jeete haiN har ik saa-at
Tire khayaal pe hum kaise iktifa karte
Latafat-e-lab-o-rukhsaar thi agar haasil
Is ibteda-e-safar ki phir inteha karte
Ik aaine ke tasauur meiN usko dekha hai
KhatoN ki shakl meiN kaaghaz ko aaina karte
Gham-e-ma-aash se muhlat mile to hum uske
Khayaal-o-khwab-o-tasauur se raabta karte
Asa banaate qalam ko to koi baat bhi thi
Usi ke zor se paani meiN raasta karte
Hamaari jaan isi waste gayee WAQUIF
TaRapte rah gaye roti ko kya dawa karte
(Waquif Ansari)