ik manzuum du'aa

[B.G.M.]

ik deegar meHfil meN,
ik Isma'il Aijaz saahb ne, ik Ghazal par apni tajziyanah guft-guu ke dauraan,
yeh manzuum du'aa raqam kee thii, jo mujhe behad pasand aayii.
YuuN to is ke kuChh TukRoN ko aap meN se aksar dostoN ne aam baat-chiit ke dauraan sune hi hoNge, magar ik manzuum shaql meN isay dekhiye, Ummeed hai aap ko pasand aayegi.




du'aa

aap duudhoN nahaayeN aur potoN phalaiN
manzileN aap ko raaste meN milaiN
aap ke dil meN KhushiyoN ke yuuN gul khilaiN

har taraf ho bahaaraaN bahaaraaN sadaa
dilkashii ki adaa, chaahatoN ki Sadaa
zindagi par fidaa raaHatoN ki ridaa
DHaaNp lay aap ko..
zindagi shaadmaaN yuuN kare aap ko
har qadam par milay saayebaaN aap ko

jis ke saaye meN ulfat kaa paiGhaam ho
pyar In'aam ho, zauq-e-Irfaan ho
‘ilm-o-vajdaan ho, raaHat-e-jaan ho
chain-o-aaraam kaa Khuub saamaan ho
pyar kaa silsilah ban ke baaraan ho

jis se man meN lagee pyaas miT jaaye sab
aap ki HaajateN puuri farmaaye Rab!

=========================================

[sameer'shaad']

WAAAAAHHHHHHHH

BGM saahab aapne jo nazraana pesh kiyaa hai wo choom ke rakh lene laayaq hai.....

ye duaa padh kar dil bhar aaya meraa... Aur laga ke bas ise padhta hi rahun, mahsoos karta hi rahun......

bahot shukriyaa ise hamaare saath baanTne ke liye.... aage bhi aapke anginat khazaano ka hame intzaar rahega

shukriyaa

Shaad.....

[iftakhar_ahmad]

waaaaaaaaaaaaaaaaaah bahut khoob, Achhi dua hai, aameen.