Arbaab-e-Zauq Ko Aadaab….!Aik Taaza Ghazal Ke Kuch Ashaar Pesh-e-Khidmat Hain…. Ummid Hai Ahbaab Ko Pasand Aaayen Gay…
Judaaiyon Se Paray Hai Wisaal Se Hatt Kar
Hamara Ishq Hai Dunia Ki Chaal Se Hatt Kar
Kabhi To Jhaank Le ik Baar Wo Mere Dil Me
Tamaam Zaahiri Husn-o-Jamaal Se Hatt Kar
Hamaray Dil Ko Maseeha Ye Dekh Kar Bola
Tumhara Zakhm Hai Kuch Indimaal Se Hatt Kar
Hazaar Aib Hain Mujh Me Magar Mera Maalik
Nawazta Hai Mujhay Mere Haal Se Hatt Kar
Ghareeb Aaj Na Faaqon Se Yuun Mara Hota
Jo Wo Bhi Sochta Rizq-e-Halal Se Hatt Kar
AHMAD ALI SHAKIL