** phoolon ki pankhudii **

[sameer'shaad']

phoolon ki pankhudii se bhi naazuq janaab hain
aashiq hoon main jin ka wo bahut laajawaab hain.

shole baras rahe hain shahar bhar mein doston
kis baat pe khafaa hain ke wo be-naqaab hain.

muskaan tarastee hai thaharne ko ek pal
chehre pe sajaae hue zaalim ruwaab hain.

ehsaan , ik nazar jo khafaa ho ke bhii dekho,
maana ke ham raqeeb hain khaana kharaab hain

saaqi hai jaaneman aur uskaa ghar hai maikadaa
zulfon ke kham hain abr to aankhen sharaab hain.

kyaa shaad main tareef karoon un ke husn kii
taaron ke anjuman mein wo ek maahtaab hain.

Shaad...