kshitiz miyaaN
aadaab-o-namaste tasleem
bhai abhi kuch der pehle aapki ek Ghazal padhii aur jiska asar mujh par kuch aisaa huaa ke dil ne zabardastii ki ke aapke aur qalaam bhi padhe jaayeN , list meiN aage ki post yahii thi aur mujhe behadd khushii hai ke aapne yaaN bi mayous nai kiya
Dheer saheb (jo ke meri nazar meiN aaj ki taakiirkh meiN urdu-adab ke bohat bade khair-khjwaahoN meiN se haiN , inhone is fann ko samajhne meiN jee-toR mehnat ki hai aur aaj bhi kar rahe haiN) ne jo tabdiiliiyaaN tajveez kiiN haiN un par bhi ga'ur kijiye, do-ek baateiN mere zahan meiN jo maiN arz karne ki gustaakhi kar raha huuN
mujh se milna tera yuN mujh pe asar karta hai
mere hone ki koi aur khabar karta hai
matlaa bohat khoob kaha hai, mubarakbaad qabuul ho!!
rang chehre ka mere dekh utar jata hai
chor ke jaane ki tu baat agar karta hai
pehle misrey meiN "mere" aur "dekh" ke baad "," lagaayeN to she'r ke maf'huum aur saaf ho jaayeNge.....yaani aap unse keh rahe haiN "dekh" mere chehre ka raNg utar jaata hai, binaa commas ya pause ke yuuN yak-baar paDhne se lagta hai ke "mere chehre ka raNg dekhe ke utar jaata hai"
she'r par daad bhi baT'or lijiye
roothne se tujhe pehle hi mana leta maiN
juzba e ishQ zara der asar karta hai
Dheer saheb ne jo is she'r ke duusre misrey par aitraaz uThaaya hai vo bilkul jaay'iz hai, yahaaN zabaan ka nuqs hai go "der" ke baad "se" jamaa kiya jaaye to wazan ka mas'alaa hai, ek suurat yuuN ho sakti hai, albatta misra halka hai phir bhi ga'ur farmaa lijiye :
jazbaa-e-ishq hai , haule se asar karta hai
maine lafzoN ko baratne ka hunar seekha hai
tera har lafz mere dil pe asar karta hai
aapne jo is she'r pe aitraaz ki evaz meiN jo wajaahat farmaayi hai voh apni jagaah durust hai lekin ba-sad-mazrat kehna paDega ki she'r ke maa'nii ataa nahiiN ho rahe, aapne jis qadar mehnat ki hai (jo ke aapke sukhan meiN saaf dikhaayi deti hai) uske baad yeh to zaahir hai ke aap ba-khabar hoNge ke she'r ke donoN misroN meiN rabt ka hona behadd lazzimi hai, mere khayaal se aapko is she'r paar khaas tavvajo deni chahiye, tabdiilii darkaar hai, dekh leiN
badzubaani meri tahzeeb bhula deti hai
aur afsoos ye dil shaam o sahar karta hai
bohat khoob miyaaN, kya she'r kahaa hai, jeete raho.....phir zabaan ke hawaale se aik aitraaz hai jo ke Dheer saheb ne bhi uThaaya hai, pehle misrey meiN "meri" ki bajaaye "mujhe" kar lijiye, chaudhaah saaloN meiN ek chaudhavNii ke chaaNd jaisa hai ye she'r, mubarak tasleem
humne seekha hai guloN ki tarah haNs kar milna
besabab ashQ bahana bhi zarar karta hai
kya kehne, kya hi kehne haiN...dil khush kiya bhai.....wazan par mujhe khaas aitraaz nahiiN hai
nekiyaN kar ke bhula dena meri aadat hai
kar ke aihsaan "kshitiz" sarf e nazar karta hai
maqtaa mujhe khaas ta'ur se pasaNd aaya, daad haazir-e-khidmat, qubuul !!!
koi do-ek saaloN se maiN kohshsih kar raha huuN ke sha'iirii se "temporary retirement" le li jaaye lekin kuch to dostoN ki zidd ki wajah aur kuch mijaaz aisa hai ke "chor chori se jaaye, hera-pheri se na jaaye" na chahte hue bhi faqat bas yahii ek mehfil hai jis se kinaara nahiiN kar paa raha huuN
uski ek khaas wajah hai balke wajuhaat haiN...ek haiN Mayank miyaaN aur duusre Dheer miyaaN....Dheer saheb se to India meiN mulaqaat bhi huii aur badi yaadgaar bhi rahi
ab aap soch rahe hoNge yeh aakhiiri do pehre kis khushi meiN likhe maine, to bhai, jo is mehfil ko choR na paane wajah "do" thiiN voh aapki badaulat aaj "teen" ho gayi haiN
meri ko'ii baat na'gawaar guzrii ho to muaafi peshagii maaNg raha huuN
mashq jaari rakhiye
rab raakha
maikash